<p>काठमाण्डौ उपत्यका खानेपानी लिमिटेड (KUKL), आयोजना कार्यान्वयन निर्देशनालय र ललितपुर महानगरपालिका कार्यालयको संयुक्त आयोजनामा २०७५, फागुन ८ गते धोबीघाटमा निर्माण हुने आधुनिक, वातावरण&ndash;मैत्री फोहर पानी प्रशोधन केन्द्र सम्बन्धमा बैठक सम्पन्न भयो ।</p> <p>महानगरपालिकाको सभा हलमा आयोजना गरिएको उक्त बैठकमा प्रतिनिधि&ndash;सभाका सांसद मा. पम्फा भुसाल, प्रदेश सभाका सांसद मा. जीवन खडका, ललितपुर महानगरपालिकाका मेयर चिरीबाबु महर्जन, उप&ndash;मेयर गीता&nbsp;सत्याल, ललितपुर जिल्लाका प्रमुख जिल्ला अधिकारी प्रेम राज जोशी, सुरक्षा निकायका प्रतिनिधि, KUKL का महा&ndash;प्रबन्धक महेश भट्टराइ, निर्देशनालयका आयोजना निर्देशक तिरेश प्रसाद खत्री, ललितपुर महानगरपालिका वडा नं ४ का अध्यक्ष नारायण केसी र स्थानीय सरोकार समितिका प्रतिनिधिहरू लगायतको उपस्थिति रहेको थियो ।</p> <p>उक्त बैठकले निम्न निर्णयहरू गरेको छ ।</p> <p>१. आयोजना कार्यान्वयन निर्देशनालयले आजको मिति अर्थात् २०७५, फागुन ८ देखि ४ दिनभित्र फोहर पानी प्रशोधन केन्द्र निर्माणसम्बन्धी कार्यको तालिका बनाइ सम्बन्धित स्थानीय तह, ललितपुर महानगरपालिका कार्यालय तथा स्थानीय सरोकार समितिलाई उपलब्ध गराउनेछ । कार्यतालिकामा निर्माणस्थल वरिपरि पर्खाल र पार्क निर्माण लगायतका कार्यलाई पहिलो चरणमा राखिनेछ ।</p> <p>२. निर्देशनालयले निर्माण कार्य शुरू गर्नु अगावै सम्बन्धित स्थानीय तहको रोहबरमा सरोकार समितिसँग प्रशोधन केन्द्रले स्थानीय समुदायलाई असर नगर्ने लिखित प्रतिबद्धता गर्नेछ र पर्खाल, पार्क लगायतको निर्माण कार्य मार्च १, २०१९ (फागुन १७, २०७५) देखि शुरू गर्नेछ ।</p> <p>३. सरोकार समितिका सदस्यहरुले आधुनिक फोहर पानी प्रशोधन केन्द्रका वातावरण-मैत्री पक्षहरुबारे जानकारी लिइ आश्वस्त हुन चाहेको र हाल देशभित्र त्यस्तो केन्द्र संचालनमा आइनसकेको परिप्रेक्ष्यमा निर्देशनालयले विदेश भ्रमणको लागि सम्बन्धित मन्त्रालयसँग आवश्यक पहल गर्नेछ । साथै गुह्येश्वरीस्थित प्रशोधन केन्द्र संचालनमा आइसकेपछि निर्देशनालयले सरोकार समितिका सदस्यहरुलाई अवलोकन भ्रमण गराउनका लागि पहल गर्नेछ ।</p> <p>४. निर्देशनालयले हाल संचालनमा रहेको अफलडोल क्षेत्रको बाटो कालोपत्रे गर्ने मागका सम्बन्धमा पहल गर्नेछ ।</p>